仔仔乖女女乖
老師都話   我要乖
校長話乖醫生話乖阿媽阿爸都想我乖乖
究竟因咩解？

乖
係個乘字少咗兩撇筆劃
唔通係怕我「乘」機唔知飛咗去邊？
或者恐怕未知咩事就學會「乘」人之危「乘」虛而入
其實啲大人係咪諗嘢諗多咗
本來只係好簡單想去乘車乘船乘飛機
又或者只係乘坐火車去婆婆家乘涼
每日仲學緊加減乘除又點明白咩叫「乘」勢追擊
喺點「乘」上去似乎都成為問題嘅日子
點會諗到大個咗
小乘大乘原來一切都係史乘之過
只有乖
就冇錯！

要乖
咪只係唔信人有自學嘅能力
想乖
咪只係方便啲大人管理等值
結果每日每天
乘興而來嘅好奇就敗興而走
只係好快學會討好或者放棄咩事都唔做
結果     咩嘢都唔再講理由
成日為咗一粒糖同成績表上面一個分數
變得時常煩惱又急躁
又或者   選擇咗遲鈍就算好

我乖我乖我一於學會做乖乖

轉眼換咗個生活國度
阿爸阿媽收到老師嘅行為報告
話我太乖對事物冇哂好奇同質素
身體肌能原來長期收到嘅只得乖乖訊號
聽講聼話早佔領咗血液嘅循環系統
審查住每分每秒嘅行為指數
見到Hyde Park塊草坪
竟然冇哂想飛想跳嘅慾望添
原來未收到老竇訊息話   可以定唔可以走

想聽醫生話每日食一個蘋果
點知阿媽大聲叫停
話蘋果係基因改造兼有毒素
我擘大個口唔知應該點做

乖乖   新聞報告上面都見到
有個細路唔知點解失咗蹤
呢個世界
究竟點樣先學到上乘功夫？

見到老師乖乖在寫報告
個記者唔敢做真實報導
只因打工要乖乖捱住做
要養活一家兼糊口
只有乖乖跟住個世界順滑流
呢啲係阿媽阿爸嘅教訓

乖   成個腦袋都係佢嘅回音！
道理   應該點搵出口？
我    可唔可以想做一個科學家？

風籽／二零二三年十一月一日