點解人 + 為會變成偽呢個字
人為為人之間應該點去排解
喺幼稚園要小朋友學嘅嘢
一一都冇真係兌現嗰陣時
諗吓諗吓
其實係咩呢

老竇叫人唔好亂講粗口
一個屈尾十自己就同人爆鑊甘
阿媽成日話做人要誠實
究竟擘大雙眼講大話又點樣計
阿公摸住個孫個頭話唔好信哂阿婆
阿婆抱住個孫鬧人話阿公唔夠老實
大佬為保持大佬個勢事事都要comment嗰陣
家姐話做女好冇地位唯有自己出去威威
細佬做細唔敢出聲但又禁不住好奇
一邊偷偷摸摸叫細妹要守住啲秘密
一家人就係咁出出入入
各自守住自己個櫃桶底

點解人 + 為會變成偽呢個字
人為為人之間應該點去理解
喺學校教人咩係禮義廉恥
實情都冇辦法兌現嗰陣時
諗吓諗吓
其實係咩事呢

阿嫲個鐡罐裝住啲私己係人都唔會問
阿爺粒聲唔出最後絕食抗議嗰陣點解
究竟佢哋一世人係搞緊啲咪嘢嘅關係
思思話阿媽自從生咗佢就冇再理老竇
念念話阿爸外面有小三其實點算係滾
結咗婚同冇結婚本來都係人咁大咁大
轉個頭大家都憤怒邊個背叛咗邊個先
做兄弟點解變成仇人
做姊妹點解有妒忌心
幾時開始一家大細日日夜夜喺度偽行

點解人 + 為會變成偽嗰個字
人為為人之間應該點去拆解
喺加沙連做人都冇得揀
邊個攞住枝槍去講公平
諗吓諗吓
其實係咩事呢

細細個嗰陣啲大人叫人唔好吓吓講打講殺
轉個身就見到鄰居因一桶水要攞架撐曬冷
學校晨早將人分級分班話方便管理
打開本書就叫啲人事事要公平對待
上網撳吓個掣就見到個世界唔係路
假資訊同自由偽造新聞講緊咩民主
呢邊廂好多屋企俾炸彈炸到咩嘢都冇哂
嗰邊廂係咁鬧咩人先有權可以合理存在

阿媽話阿爸要去打仗
阿爺只知俾人清算係冇解
人為為人都離唔開個偽字
之間應該點去破解好難講
喺加沙啲細路連鞋都冇就要走難
邊個攞住枝槍話歷史唔講咩人品
諗吓諗吓
其實係咩事呢

偽行人    唔知錯
一再打開聖經借耶穌把口
話自己係被挑選出嚟嘅優秀族群
街邊行乞嘅阿伯
彈住個結他係咁唱
風   繼續吹

風籽/二零二四年二月二十二日

Leave a Reply

Your email address will not be published. Required fields are marked *