你總愛事事挑骨頭   唔係咩?
你總以為人就會懂   唔係咩?
你總係想自告奮勇   唔係咩?
你總係一直冇耐性   唔係咩?
你瞻前顧後諗緊乜   唔知咩?
你其實知唔知道自己係乜料⋯⋯

孭住個爛鬼銜頭炫耀自己嚟自邊弗但係又冇勇氣講出口因為老闆企咗喺門口全身又立刻好似變咗另一個人嗰陣係咁秆吓邊個輩分比邊個高就連差一分秒出世都纏住唔肯放手嗰一刻
邊個又喺度翳住翳住?
(條氣唔順又喺度亂哂大龍!)

我以為愛就懂分享   唔應該?
我以為人可以共震   唔可以?
我以為分擔係理想   唔明白?
我以為世界可容納   唔係咩?
我以為可愈講愈明   唔會咩?
我其實只係想保持一份天真⋯⋯

成日計實邊個愛邊個多啲只知事事按照自己邏輯做人咁又點今朝聽朝其實已經掌握唔到琴日嘅究竟但係時時刻刻埋怨世界唔夠公平咩男卑女尊乜都出齊最後同人哋結埋婚又會點樣
一人計短二人計長好難估計⋯⋯
(點計點計都係會走哂樣!)

你句句太舀心舀肺   使唔使呀?
你事事都嫌三嫌四   使唔使呀?
你白白又悶鬼死人   使唔使呀?
你冥冥中係小氣鬼   使唔使呀?
你實實在在好尖峰   使唔使呀?
你可唔可以放低身段再學點做人⋯⋯

終日叫苦連天話條命唔夠人好皆因畀人走慢一步就變成常哦之後唔放過人又唔放過自己咪搞到日日鬼食泥咁拉住塊面搞到日日周身唔妥夾閉閉翳翳咁又食風又食住啲麈咁點去做人
唔好又投訴話自己冇得揀!
(你咪以為自己喺加蕯!)

我書我行冇乜機心   唔應該?
我上我落唔見人影   唔識做!
我問我塑感慨遊人   唔識撈!
我重我複睇光睇影   唔見得?
我思我想莫非失重   唔係卦!
我點講先至可以靠近人一點點⋯⋯

本來自由自主點知又係睇唔過眼搞到日日囉囉攣又唔認自己乜都攬哂上身之後又話個世界點會有得救先於是終日噏三噏四唔知講乜又唔知冇諗過自己有冇點點點慈悲心去體諒吓人
根本唔使講啲乜乜物物!
(真係唔使咩都當真!)

英國美國法國又點   都係鬼地方?
呢度嗰度又係邊度   都有鬼生日!
你知佢知以為先知   都係染色體!
我行我素又唔知定   都似條盲毛!
生人勿近嗰陣點先   都係急急腳走人⋯⋯
邊個又睇唔起邊個其實令人好煩躁!

儘管紐約巴黎定法蘭克福邊度好似多啲可以執金嘅位咁又點樣咩嘢都造勢作假嗰陣乜又係喺度督信人冇三頭六臂就一定搞唔掂又話人語無倫次唯有繼續死衝爛衝話再學點去再做人
誰知撐到底又只係講派頭!
(究竟比人威啲又點?)

其實咩嘢都係由過失開始   唔通唔係?
其實點會冇衰過有乜可能   唔知點算?
其實天算地算就係太計算   唔通唔係!
其實點會冇你冇我先係好   唔識點諗?
其實讀書唔一定識得做人   跌倒先知⋯⋯
今日呢一刻知唔知自己行到去邊?

講嚟講去到收尾人人都避唔到要去見周公或者最後收皮變埋鬼嗰陣話知你係博士攞咩學位或者掛住支咩國旗話畀人知你幾咁威威咁又點都係避唔到人哋繼續呃神騙鬼學埋人去齋戒
到底點算咪又係要走過條河見閻王!
(其實日日咁行已經嗰頭近⋯⋯)

有乜點算?咩點算?
由零字起!零字了!

風籽 / 二零二四年一月二十九日

Leave a Reply

Your email address will not be published. Required fields are marked *