邊個個心裏面又宜咿哦哦
閉閉翳翳又悶咗成世
唔知係咪肚皮入面生咗條蟲
搞到囉囉攣攣咁做人仔

身體本來就好奇怪
相由心生真係唔可以講小
阿B大佬只係早出世唔夠兩分鐘
成世因為輩份遊戲就做人串串貢
華仔見親人就講自己唔夠大佬威
佢話阿媽成日唔會全心攬住個細
唔怪之得
啲日本人韓國人總係問人出生年月日
早一分鐘都可以壓住人上位
喺處處講大講細嘅世界
個個只係發夢想做大佬
連大家姐都經常食住個勢頭噃
句句話自己責任大到透唔到氣
阿爸話阿爺嗰代個個係咁教做人
阿媽話見到阿婆就咁屈住咗成世
於是大大小小咁就終日挪移住自己嘅身份
連學校排隊都係咁分班分高分矮細
搞到雙眼處處成日盯住走過嘅人脈
算住身份高高低低係咁喺度搞關係

幾時可以停一陣
等個世界唔好講咩要做大做細咁做人

今日老竇又講自己屋企點排位
成日強調做人要威仲要夠架勢
阿媽話唔好忘記個仔係獨生子
講埋啲唔對秤嘅嘢做乜鬼
係咪生怕人地搞亂個秩序
將個世界重覆拉入權力鬥爭
Keep住幻想可以安樂一世

你地睇吓連安理會都只係掛住個招牌
啲子彈依然亂飛亂射咁話要控制人口
係咁比落去
只會惡性循環咁製造腫瘤
唔好睇少宜咿哦哦嘅背後
邊個心早又懸掛起枝紅旗
等緊人畀些少關心同慰問

阿媽     點解老竇嗰碟餸唔可以夾
Shhhhhh…   阿嫲話咪嘈嘈閉
阿妹同細佬早揼低哂個頭
諗老竇今日又會夾一住餸畀大佬

大大小小    無無謂謂又閉翳一世

風籽／二零二三年十一月十一日