邊個話生仔有得學㗎
學生？講笑咩⋯⋯
以前唔知邊個又話生舊豬肉好過喇
真係唔知啲人諗緊啲乜嘢
可能一個怕痛
一個怕餓死人

阿媽成日哦住咁話！

生唔生唔一定有得揀
點解啲國家愈窮就愈多細路
仲一個個畀人捉去賣豬仔
或者無端端做埋人哋戰靶
生唔生從來冇細路可以有抉擇權⋯⋯

點會有而家你地居英居港咁幸福！

聽聞加沙最近死咗好多細路
學咩人講生存嘅權利
真係一時唔知點回應
唔通佢哋係冇阿媽生
唔通有啲人唔係人
學生學生
究竟邊個揸住枝槍嘈之巴閉
唔理大細   係咁見到人就吠

細路踢波出馬路
一出橫街就撞哂板⋯⋯
個天又有嘢飛落嚟⋯⋯

唔記得邊個阿媽話生個仔出嚟
就即刻畀人鬧唔識做人老母
真係離哂譜
第一次生仔先至學做阿媽
先知社會大學從來唔收生
一下子就要識乜識物
點學點生點教仔女
更唔一定知點學行學企學做人

點學做阿爸阿媽兼阿爺阿嫲
細路的期望又變成壓力煲係咁滾
真係好過份
細個點識諗
大個咪一樣怪人怪物咁問
點解生人出嚟？

學同生都唔易做
唔講生存權利嘅社會更難堪
三歲細路嘅阿媽同阿爸
咪只有三年揪細路嘅經驗
佢哋都咪係學緊點做人
邊走邊唱本來係常情常問
只係霎時面對莫名道德權勢
咩身份增值都變得冇眼睇

學生之前
點會諗到可以唔係人咁品
造人唔係講好生之德咩
信乜信物就係睇唔到人

本來係游得最快搶到出閘嘅
一條蟲
只係如果喺加沙出世
會唔會話   爭住去碰吓運氣先
都未講完又一個炸彈飛緊落嚟
啲人唔一定去揸槍學做槍擊手
剩翻啲細路同阿媽喺戰場捱轟
每日又換上另一個記者做報導

今日成街成巷都係變型蟲⋯⋯

請問今天係幾年幾月幾日
我只係個小學生
想知點樣可以走四十一公里去探阿嘛
聽講嗰邊關卡今日唔開放

喂！有個阿媽等住生囉⋯⋯

風籽／二零二三年十一月十日