敘利亞喺邊度
喺地中海東岸
咁緬甸呢
喺雲南嘅南邊
有冇聽過一個地方叫也門
喺阿拉伯半島嘅鞋踭嗰邊
咁南蘇丹同佢近唔近
喺非洲隔住依索比亞
咁辛巴域係咪佢鄰居
南非先至同佢係近鄰
聽講仲有個地方叫喀什米爾
咁多個地方究竟點解攞出嚟問
因爲
佢哋同鳥克蘭加沙一樣
周圍都打緊仗

咪好似玩緊電子遊戲機咁刺激
點可以咁樣形容呢
知唔知點解要打仗
只知道好多人會死
最無辜係啲老百姓
真係一言難盡
就好似蒼蠅王嗰個古仔
縱使一班細路讀過吓書
本來知道要守規矩和平共處
只可惜突然唔再講文明
為咗權力就鬥個你死我活

點解用啲細路同大人比
乜唔係人大個咗學到乜嘢叫規矩咩
道德呢味嘢真係好難講得清楚

阿爸細個屋企窮
飯枱九個人爭食一碟餸
個個睇住阿爺唔覺唔覺
慢慢就習慣咗爭餐懵
一碟餸好快就唔夠食
好快喉住隔離碗飯
連一粒米都唔放過

同打仗有乜分別
細路仔唔好問咁多
咁你又攞出嚟講
總知總知
一旦要做巴勒斯坦人就好慘

巴勒斯坦喺邊度
shhhhhhhhh
唔好咁大聲呀
睇吓側邊有冇猶太人
乜電視機上面唔係好多猶太人同巴人一齊抗議咩

結果
老竇口啞啞
唯有提醒唔好死讀書
擘大眼去好好學做人

文明   有價
真係唔係好知道啲大人搞緊乜
囀個頭就一個二個變哂做怪物

風籽／二零二三年十一月九日