萬物欣欣向榮
本來係一種開花嘅想像
大家都心知花無百日好
大自然本來自有其數目

今日視野畀啲高樓大廈擋住哂
眈天望地似乎為咗睇恆指交易
抬頭望吓似一格一格整整齊齊
唯獨冇諗過裡面通通亂哂大坑
個世界玩投資當食生菜
虛榮心係最大嘅貨色
問題係
榮字嘅木頭上面再加兩把火
可以點頂?

幾多人仲住緊劏房
日日幻想自己飛上天見到一度曙光
比起加沙一百一十一日嘅轟炸
可能以為比冇得揀幸福好多
分別係一個快一個慢
似乎都係畀謀利集團玩死
一邊以生存權利去玩滅絕
一邊為最大利益揸乾人哋
連一個字一首歌都大弄法紀
喺弄權者眼下你你我我係冇乜分別
虛榮心變成假想嘅志氣
木頭上面嗰兩把火
一把講權勢
一把講凶狠
知識老早販賣成燃料
學校成為扶植社畜嘅基地
老子嘅世界邊個會去理
一邊話發現宇宙大到九百億光年
一邊數住企業財產多咗幾多佻億

坐喺太平山上面
諗唔到太平個名點解
雖敗猶榮畢竟需要嘅係心理平衡點
榮辱呢兩味嘢
自小就喺班房畀老師亂點鴛鴦
以後每日每天
都拚命夾喺生存嘅filo入面
一朝志氣只係想跨過垃圾堆
樹立個人嘅品牌同榮耀
冇諗過
成個過程
所謂成就背後儲存咗嘅同垃圾冇分別
榮光   成為一生終極嘅負荷

想學人埋堆
一起製造虛假嘅招牌
日日網上行街
分唔清邊啲係假係真
光榮地
連教堂廟宇都用上霓虹燈嗰日
只能返屋企
對住盆萬年青
等見證吓開花究竟係點

時代廣場嘅電子廣告板上面
今日亮點係
大灣區嘅樓好平
紐約嗰邊
川普又出嚟同世界揮手
連大峽谷上面都有即時通訊
歷史記載
話邊個邊個首先發現嗰樹嘅奇境
世世代代住喺谷底嘅印第安族群
手執捲煙
望住飛過嘅兀鷹
知道   差唔多時間休息

文明之光   其榮   怎辯?

風籽 / 二零二四年一月二十五日

Leave a Reply

Your email address will not be published. Required fields are marked *