阿三有日好閉翳咁問老友記
可唔可以睇吓佢個仔係咪有問題
佢話老師見個仔唔合群
要轉介去見學校社工
社工就話同佢先開個File
再轉介佢去醫院做檢查咁話
醫生冇望過個細路一眼
只係睇住個芒係咁輸入啲唔知咩
跟住排期叫阿三老母帶個仔去驗乜驗物
之後再去隔離病房睇精神科醫生
只係冇一個人認真望過個細路一眼
更冇人去探訪佢嘅家庭生活狀況
就同佢開咗一炸檔案
話方便日後管理同跟進

個細路啱啱先過咗五歲生日

朋友去探訪阿三一家
個仔玩得十分開心仲好好勝
見佢要乜阿爸阿媽永冇托手㬹
仲識得同細佬爭玩具喪玩
只係平日
個細路長期自己一個人
阿媽阿爸幾乎日日要開工
菲傭要睇住個細嘅根本冇多餘時間
誰知姐姐家郷仲有個病緊嘅仔
每日打電話擔心緊遠方屋企人
一時三刻排山倒海嘅家事工事唔少嘢
點夠精神去全力照顧阿三囝囝嘅要求

正喺阿三愁緊應唔應該做乜做物
唔知好彩定唔好彩
一家突然決定要移民
阿三話而家屋企後園有塊草地
大家多咗時間一齊赤腳玩轆草皮
個仔返學一星期
又冇功課壓力要做啲乜乜物物
仲識咗幾個朋友仔一齊踢足球
而家阿三同老友話
好在啲檔案唔識飛
佢朋友話而家個世界好難講
話唔埋一朝喺個芒度飛出嚟

阿三話唔好講笑喇
轉個頭就畀兩個細拉咗去後花園
剩低細路阿媽繼續日日睇住手機咁做人

阿三只係話
顧得頭嚟腳反筋
真係唔知點選擇
只見好多電子檔案飛埋嚟
佢突然想完又想
囝囝嘅世界
會唔會畀呢啲數碼綁架
突然佢變咗先知咁威
話其實好多人都喺度睇緊佢個仔
大家喺塊虛擬嘅人造草皮上面玩
隻手指反應幾快都變成電子訊息
入哂檔案咁話
死諗爛諗
又繼續閉閉翳翳⋯⋯

而家阿三同朋友只能隔洋打話
望住好大嘅天空問卜打卦

風籽／二零二三年十一月十二日