本來係超級正嘅自然物體
其實點解將泥沼睇成污穢
一篇小學文章
咩嘢出污泥而不染不妖
自始將好嘢打造成妖孽
所謂托物言志
個世界就係咁變哂質
天啊!天啊!
可唔可以帶小朋友先去紅樹林走一轉
又或者去濕地公園睇吓先

語言   點解變吓變吓成泥沼區域

細個喺電視睇人地泥漿摔角
見到啲大人唔知玩得幾開心
只係一個遊戲
一邊矒埋雙眼話污糟邋遢
一邊又會笑到見牙唔見眼
咩叫見到泥就亂咁吠
究竟咩叫做污穢咩係乾淨
天啊!天啊!
個世界好似老早畀人搞到十分混淆
自然現實同人為現象撈埋去睇

語言   咩時候變成最大塊嘅泥沼區域

諗真吓文人說書同靚仔睇漫畫
講落好似啲熱泥咁煮埋一大鍋
咩先算不良意識
究竟咩係真咩係兒戲都搞唔清楚
結果畀人攪攪吓先攪到成汁成味
又鍾意評頭品足
又將啲土壤壤土淤泥黏土變成妖魔
天啊!天啊!
一篇愛蓮說變成好心做壞事
大地嘅沉積變成咗道德消費

語言   先至係最大塊嘅泥沼區

釋法惡法確似嘔臭咗嘅泥漿飯
真法假法一概確實難入胃入口
知識同補品亂哂坑
難怪易經一個字都唔寫
老早睇出人同物會變卦
咩孔子老子
先賢嘅說話一早變成冷飯殘渣
畀啲政客翻成狼心狗肺嘅狂言
天啊!天啊!
好似道德經係咁畀專家翻譯
究竟本來嘅意思變成咗乜嘢

語言   反覆翻轉結果逃離唔到泥沼區

喺烏拉克同加蕯又落咗場大雨
血漿同泥漿喺戰區混埋一坺坺
點去定義泥沼嘅顏色
本來有較高有機物質嘅污泥
本來水同細小嘅土壤傾密偈
長出一朵蓮蓬
點知泥沼下面滲出幾多細路嘅血腥
點知沼澤變成一個龐大嘅亂葬吸盤
天啊!天啊!
一班周身染屎嘅知識分子
又擺出正義嘅架勢講同盟

語言   泥沼   老早搞唔清咩係咩嘢

風籽 / 二零二四年三月三日

Leave a Reply

Your email address will not be published. Required fields are marked *