假如將沼泥解體
既會係一門自然學課
亦係建築學重要嘅活材料
地質學家會爭住提出好多意見
單單一個巴姆古城啲考古佬就會話
泥磚係人類古代文明建築最重要嘅基石

公元前九千年巴勒斯坦人喺約旦河西岸
已經開始咗一個叫耶利哥嘅聚落群
喺月神關照下文明同泥沼結緣
唔知邊樹又想翻開本聖經
古時嘅東方佈滿泥城
駁出一大堆古仔

啲泥磚疊埋疊埋變出幾多個世俗
啲泥沼曬乾咗就搞出幾多種嚮往
啲說話就咁喺啲磚罅度竄出竄入
啲聚落一個一個咁起完又被破壞
啲泥磚又變番泥沼嗰陣點悟蒼生

皮膚色澤似泥造
深深淺淺嘅歷史點計
血水同泥漿老早撈埋一齊
是非爭拗睇白會繼續見唔到底
加上企業同大政府意志壟斷埋思考
大量製作意識泥沼叫你每日重複戴口罩

好多人話唔好亂咁一個人闖入泥沼林區
裡面好容易會踩到地雷式嘅食人洞
今日手機啲地雷多到你睇唔到
世界又畀班咩嘢人物支配
眼前事事同沼泥混合
點睇到開心蓮花

啲泥磚砌埋砌埋變出幾多個族群
啲泥沼曬乾咗就見到幾多種希冀
啲說話就咁喺啲磚罅度傳吓傳吓
啲聚落一個一個咁殘破又被翻土
啲泥磚又變番泥沼嗰陣再悟蒼生

假如謊言有價值
言荒嘅日子會更珍貴
翻開歷史都唔知真真假假
講到地緣同咩種族都係唔好惹
各方係咁誇張自己擁有存在嘅權利
一言一語頓時變成一堆大家死纏嘅金句

今日嘅沼澤冥冥中變成咗全世界保育區
聽日究竟會係點樣就咩嘢都冇人知
人間倫常有序無序本來難預料
一坺泥可以造就花開花落
甚至衍生出生態奇景
只係意識作弄人

風籽 / 二零二四年三月五日

Leave a Reply

Your email address will not be published. Required fields are marked *