蛋白的寄語
*藝行研究員陸嘉琪在生活館按是日訪談建築的戲劇習作一
【電動攪拌機發出很大的聲量】
電動攪拌機:兩個兩個!
【一班雞蛋正在排隊,等待被搞拌】
電動攪拌機:兩個蛋黃嗰啲!留一個,多咗嗰個,去另一間房!
【正在排隊的雞蛋在悄悄話】


蛋白一:喂喂,佢地去另一間房做咩㗎?
蛋白二:聽講呀,嗰間係垃圾房嚟㗎…
眾蛋白:哇!…
蛋黃二:媽咪,我唔要做垃圾蛋…
【眾蛋黃都開始哭起來】
蛋白二:唔好喊,我地都唔係雙黃…你乖乖地痴實我,就可以一齊做梳乎厘㗎喇!
雙黃蛋白:做人呀媽你咁講野嘅?
蛋白一:唉!你要二揀一㗎,如果唔係全家變壞蛋呀!
【一頓】
【雙黃蛋拉實雙蛋黃兄妹走到隊尾,重新排隊】
雙蛋黃哥哥:媽咪…我去垃圾房,你同呀妹去做梳乎厘喇!
雙蛋黃妹妹:媽咪…我去垃圾房,你同呀哥去做梳乎厘喇!
雙黃蛋白:…
【電動攪拌機發出很大的聲量】
雙黃蛋白:你地想做梳乎厘咩!
雙蛋黃兄妹:咁我地可以做咩呀?
雙黃蛋白:你地有無聽過肚臍餅嘅傳說?
【雙蛋黃兄妹用期待的眼神等待故事】
雙黃蛋白:從前有一個蛋,佢一出世就得蛋白,無蛋黃,佢由細到大都希望搵到佢嘅蛋黃,佢都想同大家一樣,做到一個令到人感覺到幸福嘅梳乎厘。有一日,佢搵蛋黃搵到好夜,天都黑曬,佢發現佢已經盪失咗路…
【此時,砂糖經過,他在躲避些什麼,離場】
雙蛋黃兄妹:跟住呢跟住呢?
雙黃蛋白:佢又攰又餓…唯有搵個地方休息吓先,突然間,佢俾啲野吸住咗!
【砂糖跑過,他正在推開些什麼,離場】
雙黃蛋白:佢向下一望,係一棵遠古植物…「蔗」!
雙蛋黃兄妹:哇…
雙黃蛋白:佢一路掙扎,一路大叫———
【砂糖跑過】
砂糖:你唔好痴住我!
雙黃蛋白:放開我呀!
【砂糖再跑過】
砂糖:冷靜啲!
雙黃蛋白:道不同不相為媒!
【砂糖跑入,停下來喘氣,他對著不明的對象説】
砂糖:我忍你好耐㗎喇…
雙黃蛋白:你放過我喇…
砂糖:我接受唔到…
雙黃蛋白:我唔想就咁就完咗我嘅一生…
砂糖:你一無事處!
雙黃蛋白:我仲有好多野未做㗎!
砂糖:邊個叫你咁平凡啫!
【砂糖再跑了出去】
雙黃蛋白:蔗就同佢講:「你想做咩?!」,蛋白就話:「我要做一隻有用嘅蛋!」。蔗就話:「如果你願意同我一齊冒呢個險,我地就可以一齊令到人感覺到幸福。」雖然蛋白都好驚,但係情況危急,佢唯有博一博。
雙蛋黃兄妹:最後點呀?
雙黃蛋白:最後,佢地成為咗世界上第一粒肚臍餅。
雙蛋黃兄妹:傳說中嘅肚臍餅!?
【砂糖跑入,撞倒了雙黃蛋白一家人】
雙蛋黃兄妹:呀!———
雙黃蛋白:呀!———
【雙黃蛋白一家人因為激烈的撞擊,蛋白和蛋黃兄妹分離了】
【雙蛋黃兄妹暈倒了】
雙黃蛋白:你——你做咗啲咩呀!?
砂糖:對唔———(他看到眼前的蛋白)Oh…
雙黃蛋白:呀仔!
砂糖:my…
雙黃蛋白:呀囡!
砂糖:god…
雙黃蛋白:No…【雙黃蛋白哭起來】
砂糖:緣份天注定…
雙黃蛋白:No…
砂糖:半點不由人…
雙黃蛋白:No…
砂糖:要來的攔不住…
雙黃蛋白:No…
砂糖:要走的留不低…
雙黃蛋白:No…【雙黃蛋白哭得更厲害】
砂糖:兜兜轉轉…
雙黃蛋白:YOU…
砂糖:紅塵萬丈…
雙黃蛋白:SHUT…
砂糖:早有安排…
雙黃蛋白:UP!———
【靜默片刻】
雙黃蛋白:佢地由細到大都無離開過我…而家…就俾你呢堆散沙撞開咗!?
砂糖:…
雙黃蛋白:點解你要拆散我地一家人?你自己散就好喇,做咩要我陪你散?
砂糖:…
雙黃蛋白:(音2)散呀!(音3)散呀!(音2)散咗就要(音3)散喇!即係講再見呀!
【雙黃蛋白低泣】
砂糖:Hi。
雙黃蛋白:…
砂糖:你可以叫我糖哥。
雙黃蛋白:…
砂糖:我地係咪見過面㗎喇?
雙黃蛋白:…
砂糖:我一直都以為,人生只有一種味道。
雙黃蛋白:…
砂糖:我一直都喺度避開呢種味。
雙黃蛋白:…
砂糖:啱啱嗰一刻,見到你之後,我就明白咗咩叫人生百味…
雙黃蛋白:…
砂糖:原來真正嘅甜,可以唔係淨係得糖嘅味道…
雙黃蛋白:…
砂糖:真正嘅甜,叫香甜。
雙黃蛋白:…
砂糖:你叫呀香?
雙黃蛋白:你講完未?
【砂糖跪下】
砂糖:你,願意同我一齊做肚臍餅嗎?
雙黃蛋白:…【雙黃蛋白沒有再哭】
【雙蛋黃兄妹醒來】
雙蛋黃妹妹:我要做肚臍餅…
雙蛋黃哥哥:我又要…
雙蛋黃妹妹:但係我地係蛋黃,點樣可以做到肚臍餅呀…
雙蛋黃哥哥:我地要搵到我地支野!
雙蛋黃妹妹:支蔗!唔係支野!
【砂糖拿出一本食譜】
砂糖:你,願意同我一齊做肚臍餅嗎?
【雙黃蛋白接過食譜,打開,一道刺眼的光芒從食譜湧出】
雙黃蛋白:呢個係——
【雙蛋黃兄妹也走近看】
砂糖:焦糖?
雙黃蛋白:燉蛋?
雙蛋黃哥哥:Creme?
雙蛋黃妹妹:Burlee?
【眾人互相對望】
畫外音:均勻攪拌蛋黃和40克細砂糖…直至細砂糖完全溶解在蛋黃液中…
【眾人慢慢像浮在水中,漸漸浮成一個圈,像身處在一個漩渦中隨著水流公轉】
將淡忌廉和牛奶倒入鍋子中…並且加熱至80攝氏度…
【除了公轉,眾人慢慢自轉】
分開數次慢慢加入蛋黃液中…攪拌均勻…製成布甸液…
【轉動時快時慢,圓圈時而大時而小】
過篩布甸液…然後倒入陶瓷模具中…
【眾人聚在一起】
設置焗爐上下火為150攝氏度…往焗盤裡面注水…
【轉動慢慢變成熱烈的舞蹈】
隔水蒸焗大約40分鐘….
【舞蹈變成慢動作】
在焦糖燉蛋表面撒上一層細砂糖,使用火槍噴火加熱熔化砂糖,形成一層香脆的焦糖糖衣。
【砂糖與雙黃蛋白累得跌倒在地上,靜靜地觀看著雙蛋黃兄妹自由的舞蹈,他倆像是一體】
雙黃蛋白:我記得喇,肚臍餅唔係一個傳說…
【燈滅】
【全劇完】

Leave a Reply

Your email address will not be published.