喺充斥住垃圾資訊嘅世界
周遭嘅虛擬實境
橫衝兼直撞
幾多神經   即時打哂格仔

優   雅
似乎都係fake出嚟嘅電子廣告

珠珠以為自己明白咩係咩
終日手機玩自拍
嬤嬤以為孫女
好勤力
仲話自愛   係好重要㗎噃

優   雅
似乎係已經失散咗嘅姊妹弟兄

冇諗到打開微型鏡頭
閒閒地儲存萬張畫面
只係唔知邊張最吸引
只見個個都係揼低頭   死咁搵
呢張嗰張   無法認真起眼

優   雅
垃圾膠袋畀風吹起就嘆作驚人

閃閃拍拍又過咗一日
留低過咩就唔識形容
只係不停問有乜感覺
怕係有感冇覺
舌頭低下   又多咗粒石春

優   雅
竟然只係聯想到韓星慢鏡畫面

官能刺激愈玩就愈大
專注喺一件事覺得好難挨
窗外有雀仔飛過又點
鬧脾氣話   只係手指太慢

優   雅
喺充滿菱角嘅世界點樣出頭

點知暴風前百鳥爭鳴
一隻藍鳥巍然降落在搖擺嘅枝頭上面
迴望四周   一息間就飛走咗
狂風驟然而至   捲走一線炊煙
霎時好似一滴露珠向世界揮手
只係   冇人在意

優   雅   可以係點⋯⋯

風籽／二零二四年四月四日