如常走過
路邊草皮上面嘅白雪
已經變成灰色
一個不知名嘅腳爪印
變成奇型怪狀嘅水氹
反映住遊過嘅白雲

一部好奇嘅手機
映低咗嗰坺泥濘交織嘅畫面
似泥非泥
似雪非雪
時間好似突然被鎖定
黐住嘅垃圾
好似話歷史要分一杯羹
喺刁鑽嘅地方出沒
只係頭緒同情緒扭埋一齊
連啲草根都凸出嚟要講嘢
問
究竟人去咗邊

聽講喺卡加利近日出現好多呢啲泥濘雪溝

如常咁走
近日落咗一場大雨
隔壁草皮前面
嗰晚多咗一隻腳印
變成咗一個大水氹
反映住
一座大樓天台

一部好奇嘅手機
試圖追蹤一個駭人嘅畫面
似影非影
似人非人
好似鎖住咗時間
泥濘上面
爬過嘅蟻群話見到
水溝曾飛過嘅人影
一個嚟自香港嘅細路
問
來世仲想唔想再做人

聽講喺家鄕冇人知道近日呢邊連環跳樓

如常揸住支筆
外面山林特別靜
只係唔同嘅綠色
一直沒完沒了咁叫囂
遮住下面日前雨後嘅水氹
睇唔到反映
泥濘
點可以變成新聞

對住一本畫簿
打開泥濘裡面嘅線索
似明非明
似真非真
時間究竟玩緊邊瓣
水一旦冇氹
好快就自動流失
借影回形嘅日子
只留住心留唔到人
問
邊個又要喺泥濘上面踩上一腳

聽講個影喺殮房瞓咗幾日等緊家人去認領

泥濘 小心
今日將有暴雨
係移形換影嘅時候…

風籽／二零二四年五月四日