唔知道係白定黑
一概係閉門會議
置身其中
個心又十五十六
諗住點做一個人

由芝麻綠豆嘅事
到用唔用到drones
可大可小
個個都唔知講乜
眉頭    好似有一道氣場
夾到實一實

口邊話民主兼開放
額頭都孭住個身份
鍾意喺度論資排輩
就連選舉
邊個話
禽晚已經知會咗好多員老

以為個個係讀書人
好似阿嫲話齋
都係著過屎片長大
點知走出咗咁嘅樣
只識跟紅頂白
口話義氣情長
其實喺度 搞埋堆

就算喺聯合國演講
秘書長嘅逆耳忠言
轉個彎已經成為虛偽陳詞
個個都大大聲話愛國
點知都係
保住自己財產嘅擋箭牌
尊貴嘅    上大人孔乙己
又使緊橫手    爭緊排位

係黑係白從來唔重要
閂埋門唔一定一家親
只係睇錢做人
鬼都知地球迅速暖化
不過靚仔自小學會爭崩頭
個個教育成才只會爭上位
點會真係識得認真    開會

私底下人人有自己agenda
只係個個睇住時勢出牌
什麼議題
三分鐘就變到唔知咩樣
舉手表決通過
都話    原則支持
踏出門口    即刻撳機計數

開一次會    唔知又浪費咗
幾多條 生命

風籽／二零二四年九月二十九日