假如三個圓圈係三個生命週期
或者好似三個拉住後腿嘅黑洞
三代時光
三段失語嘅症狀
聲音   好似成日畀人哋搶走
語言   好似迷失咗講嘢軸心
三個圈氹氹轉   係咁轉   係咁轉
一個又一個嘴巴搶住哂咁鑽出嚟
個個都想佔領人哋個腦袋
幻想成為人哋乜叉物叉嘅   代言人

三個圈圈   似夢非夢
好似廣告牌上面嘅招魂索
將幾多身心靈圈走⋯⋯

老師教授醫生同乜長物長兼書記
究竟憑乜叫人唔好做呢樣做嗰樣
商人名人先人同人呢個嗰個
指指點點問前問後耍呢弄重
佢哋嘅眼前人
點解都變成一堆堆借用嘅數據
將生活壓縮到不可理喻嘅符號
猶如叫人咩事都唔好做
猶如咩事都叫人學倒模

三個圈圈   似夢非夢
好似教堂廟宇裡面嘅勾魂索
將幾多身心靈迷走⋯⋯

家人七嘴八舌咁搶攻話要點樣點樣
一個個搶閘咁擺出哂身份噏三噏四
其實佢哋知唔知道自己講緊啲乜嘢
講呢講路係咪畀血緣關係玩到咁盡
好似成日要拉人入過海隧道
睇見喺入口上面掛住嘅招牌
簽哂名話自己係乜乜嘅代言人
原來人間夢幻係咁愛玩弄浮誇

人地畀錢畀金打做一個生招牌
弄權弄勢只係想同人試高試低
將人每日生活如此如此般監控
著乜使乜穿乜攞乜事事大條道理
因為個個晨早冇得走畀人點哂相
連結婚生仔都按酒席價格去開位

三個圈圈   似夢非夢
好似拜堂成親裡面嘅牽魂緞
將幾多身心靈就咁串連一生⋯⋯

查個究竟   係身體作怪
定係自小畀人將垃圾塞入腦袋
點解啲明星變成智慧象徵
個個只係掛住四萬嘅口吻
喺度炒作翻版式雜碎語話
未搞清楚已經又鑽咗入唔知邊個窿
想爬翻出嚟又畀一條隧道扯翻入洞
生化系統又時常喺度亂作怪
以為劈酒劈藥就係混沌出口
屋外棵樹乜都睇穿哂   睇穿哂

三個圈圈   似夢非夢
好似喪禮入面嘅斷魂鎖
將幾多身心靈斬開   再黐唔翻埋⋯⋯

風籽／二零二四年一月三日