邊個話返屋企時時刻刻都好似走上棋盤
住喺入面嘅人究竟選擇留低定決定出走
真係無法預計   無法預計

一個個櫃筒裝住啲乜唔一定係人都知道
一排排衫架掛住嘅可能係某長輩嘅傲慢
唔小心跌咗落地嗰陣唔一定有人扶起你
成間屋都畀意氣飛出飛入嗰陣真係點頂
鬼上身連咁祖宗十八代都走出哂嚟趁墟
房間廚房同僅僅可以企得一個人嘅露台
隨時都可以變成開火或者逃離現場嘅窿
捐出捐入只係想避開呢個嗰個嘅透視鏡
局   因為距離太近
焗   因為地方太小
局   因為念頭拘束
侷   因為心胸變窄點計

而家人人都話要住大屋閊埋房門話自主
其餘只剩番鍵盤把聲同外傭三餐打招呼
講到底少見到人影   少見到人影

睇落ghostbuster真係好受用
將一屋裡外莫名嘅侷促驅走
喺失能之前放低啲狗咬骨頭
容許意外發生係需要嘅美景
情感淵藪真係好難講得通順
邊諗到自尊受到踐踏係磨練
就連啲基因從中作梗又點計
溫暖寒衣唔一定係老奉出現
放低身分角色先可以人開展
睇嚟睇去從來都係局中人脈
局   真係可以溶解
勢   睇眼界點落實
局   時常偏安傾斜
格   又僵又殘就該煨囉

啲習慣由香港帶去唔知邊樹落腳嘅地方
屋企少咗阿公阿嫲吟吟沉沉把聲好唔慣
呢個局究竟點睇   究竟點睇

人地話世界本來就係一個橫七豎八嘅天仙局
自己喺裡面成日搞唔清楚究竟係人定係鬼仔
而家個個話做貓做狗比較矜貴
誰知道都係自己搞出嚟嘅局面
咩人坐喺立法局就會生產出咩牌局
屋企
何嘗唔係一樣 唔係一樣？

風籽 / 二零二四年一月二十日