一家人坐埋一齊食飯
阿公阿婆唔一定喺同一個世界
阿爸阿媽其實嚟自唔同嘅家鄉
班後生又唔敢頂撞班老鬼亂吠
一圍枱對住個電視等大選結果
明知各有所想
究竟邊個首先離場
只係想顧全大局留番啲空間
留低嘅人死都話要撐到底先肯走
唔同時代有唔同嘅態度審度時勢
大大小小最後能否順利歸位真係難預計

睇住人地享受民主嘅情景
呢味嘢真係仲爬緊學浸淫嘅階梯
意識意志同意慾
經常變成意氣用事冇哂儀態
可以選嘅材料本來極之有限
只係好過隔離死錬住嘅獨裁魔法

家嘈屋閉在所難免
睇住房入面嗰粒啱啱出世嘅豆釘
大家難免又熱血起嚟
繼續幻想他朝個世界會變好一啲

人人都想破局
只係真係睇到大局嘅人好少
就算畀你睇到都無法控制
大家可以揀嘅空間本來就極有限
明知虎山難行
最後又係畀人動刀動槍攞去做規劃
一個唔覺唔覺又畀差佬亂咁拉埋入冊

世局難料
個個都揸住部手機幻想玩操控
點會知魔鬼都呢埋喺啲app屎後面
認親認戚都冇法子脫軌甩身
最後只能學人再玩另一盤出局遊戲

文明可貴因為長期未喺骨頭生根
先至又畀人擺佈兼塞住進步嘅出入位
最後鑊鑊都係一齊借殘局去做假做勢
樹上面隻黑貓睇到睩大雙眼
望住成班人你推我撞一齊想出軌
最後人踩人嗰陣只會話係人地嘅問題
擦出火球嗰陣
又畀人用藍色水砲玩驅散兼將軍搶位

局裡局外各自亂咁去猜
睇住超市啲物價瘋狂暴漲
最後水浸又唔知隻船係咩人領航
見到大霧霾漫
遠遠好似有一個又一個島
大家未搞清楚就喊住要上岸
以為自己係Marvel入面嘅超級英雄
幻想學埋哪吒穿雲駕霧
點知大大小小嘅島嶼好似星星咁多
究竟應該揀邊個去著陸再玩過

最後
發現剩番部年少日記
先睇到大家忘記咗最根本嘅日常
人文關懷
唔知幾時
早喺條街同屋企消失咗

風籽 / 二零二四年一月十三日