老竇成日講呢講路
日復日咁吟吟沉沉
究竟係想我聽佢話
定係學哂佢就識做人⋯⋯

阿媽成日愛做嫦娥
日復日話我唔聽教
究竟係想我變先知
定係想人跟住佢尾先⋯⋯

唔知佢哋講緊嘅道理係咪叫道德
如果個世界真係咁簡單就得人驚

自從佢哋做咗家長
好似變咗另一個人
搞唔清楚所謂責任
啱唔啱都要硬住去嵌⋯⋯

重複差異一線之隔
傳統傳承點樣去摸
個個趕住做咩傳人
老竇老母點知咁多喎⋯⋯

口邊掛滿連自己都未搞淸楚哂嘅道德
咩仁義禮智佢哋點知道一一虛實難分

時間呢味嘢唔係路
條數從來唔似歷史
人地話乜從來冇數
跟跟吓又成真理咁話⋯⋯

乜乜物物箇中道行
怎可空口咁亂輸出
行動同意識嘅交織
本來就充滿好多雜質⋯⋯

世界點會事事理所當然咪乜都唔使做
道德點可以似賣菜咁日日攞嚟去速銷

阿爸阿媽只係凡人
吓吓頂撞亦無鬼謂
人出世點只咁簡單
基因記憶日日同你哄⋯⋯

你道佢嘅德行難明
我話佢嘅行為好正
錯對對錯之間無間
空空虛虛又翻上幾翻⋯⋯

非常常非本來冇大冇小唔值得去閉翳
老莊孔孟只係曾經唔同脈絡嘅過路人

唔好咁驚又怕面青
老竇老母一直存在
要放過人地同自己
先知道今天只有一次⋯⋯

當下才是永恒邊個唔識講乜嘢係乜嘢
鬼唔知道道可可全知全覺係宇宙本能

你你我我本來道德
點知傳傳吓變成乜
好好壞壞嘅經驗談
重重複複之間尋找差異嘅樣貌
堆堆砌砌邊個又喺度亂喊亂呔

驚！
點解道德變成恐慌⋯⋯
驚！
點解道德可以殺人⋯⋯
驚！
點解唔知點叫係真⋯⋯

風籽 / 二零二三年十二月十日