日日望住部手機
幻想自己係邊個邊個
一個又一個
搞唔清嘅蹉跎
一秒又一秒
跳跳接接人家借番嚟嘅    留言同玉照
自己以為深刻嘅片段
係咁重複撳住嗰個芒
係咁傳畀以為深交嘅fan屎
以為自己係     邊個邊個

唔覺唔覺
身體似部手機感應器
以為自己可以通靈
以為可以玩盡世界
點知只因自己嫌三     嫌四

日日郁住隻中指
話自己其實係邊個邊個
篤完又篤
根本唔知篤緊啲乜
畫完又畫
彈出彈入都離唔開個啲     廢話同垃圾
自己以為有用嘅連結
只係唔知畀人演算緊
只係唔知自己邊庶渾
以為自己係     龍嫂龍哥

唔覺唔覺
咩時候身體大喊大叫
以為自己做緊大班
以為可以瞞天過海
點知又話冇時間    翻生

日日望部機回應
唔知自己嘅無知兼廢噏
滑完又滑
連雙眼都喊要停
翻完又翻
洗來洗去同人哋洗哂版    嘥聲兼嘥氣
自己以為好醒乜都識
點知其實正一係盲丙
點知其實係畀人玩死
以為自己係    超人超勁

唔覺唔覺
啲時間好似好快跳掣
以為自己個腦閉塞
以為真係冇咩所謂
一停咗部機就唔知     做乜

日日根本冇日日
誰知複印緊自己嘅愚笨
諗完又諗
只係喺度食白果
轉左轉右
誰知兩千年前已停產嘅     精神食糧
自己以為傳承到今日
其實一早已經靠邊站
其實一早絕了子孫根
以為自己係     矇面超人

你以為你

我以為我

究竟係講緊邊鬼個⋯⋯

風籽／20260206