一早爬起身
無厘頭伸個頭出窗口
左望望右望望
順口溜出一堆冇厘搭霎嘅人名
跟住攞起床邊部手機
紀錄一下對面街嗰棵郁吓郁吓嘅樹影

如是     開始另一日嘅生活行程

其實好想合埋雙眼
少理個芒彈出嚟嘅川普垃圾
五分鐘又忍唔住手
畀啲狂蜂浪蝶搶走成個人
將乾坤倒置
連懶都變成了問題

如是     幻想自己似金花般神袐

如果話躺平係霎戇
或者只係吱吱唔唔喺度 buy time
究竟係咪霎時衝動
有幾多人會算入腦袋
允許直戇一下    又何妨
路     在兩腳之間自然衍生

如是     根本不需要任何人去支持

喺人人都要認叻嘅世代
忘記世界有啲嘢從來一致
好似魚要喺大海
雀仔要喺枝頭外望
今日我不知所措咗幾多個二十秒鐘
原來走神連天光都要借位

只係想停一停     唔想事事太過清楚

其實從來搞唔清自己係男定係女人
兩眼之間
一直有多隻眼話有選擇
傳說有一個天心
古人個「文」字本來有一個心
非男亦非女     總之唔會傾向任何一端

如是     身體現場只係寸土尺宅

霎戇     先見到
一刻自發性的天上迴響
先好好躺平    好好呼吸

風籽／20260208