佢話會做好份工
冇諗過咩職業先算真係好正當
佢話有樓要供有家要養
唔諗得咁多

其實邊個會自問屋企實情係點樣⋯⋯

佢話唔知自己點解喜歡著制服
冇諗過套衫會令佢自信爆棚
佢話識做仲可以豬籠入水
唔諗得咁多

其實個社會事事講成就佢都想有一份⋯⋯

佢話讀書比人少好難同人哋爭上位
冇諗過坐上面嘅一樣會跟腐敗同行
佢話邊個世界唔係咁
唔諗得咁多

其實心知真係讀好一本書難過登天⋯⋯

佢話自己唔係正義嘅先頭部隊
冇諗過為乜要爭上前線扮威武
佢話事事都係照柯打落單做
唔諗得咁多

其實係長期畀三國諸侯割據嘅邏輯洗哂腦⋯⋯

佢話拉人上去審其實都唔理係咪同鄉同袍
冇諗過釋法破法搞到唔係人咁品
佢話老闆明示人人聽阿爺講就有著數
唔諗得咁多

其實阿公阿婆走難嗰日就預咗可能要翻轉頭⋯⋯

佢話人窮志短點去講咩尊嚴同清高
冇諗過時勢突變隨時會畀人將軍
佢話比起加沙難民算好好運
唔諗得咁多

其實邊個真係想衰畀人睇⋯⋯

佢話人人點睇佢真係唔知點講至啱心水
冇諗過以前人家覺得嘅威水今日變泥鰍
佢話邊個唔想平衡一下內心水體
唔諗得咁多

其實做好每一日嘅自己已經好唔簡單咪係⋯⋯

佢話終日疑神疑鬼只會冇覺好瞓
冇諗過幾百年嚟唔知幾多人不停咁走難兼走佬
佢話日日畀CCTV 照到實仲可以竄得去邊個世界
唔諗得咁多

其實眼前所謂嘅太平日子從來得嚟不易⋯⋯

佢話網絡媒體點講完全冇釐搭霎可以指東劃西
冇諗過上綱上線亂吹亂噏會咁Q大鑊
佢話人講你講已經個個都冇哂品格
唔諗得咁多

其實點解要花費時間畀人地支配住自己生活世界⋯⋯

佢話其實從來唔知點先算係做緊自己
冇諗過喺現實中真係完全可以有得揀
佢話今日唔知聽日唯有邊走邊唱
唔諗得咁多

其實冇乜咩係其實可以講得出其實係乜⋯⋯

佢話只有繼續口噏噏話畀自己知
要撐落去
要撐落去
要撐落去⋯⋯

風籽／20260116